Amaravati Capital : అమరావతి గ్రీన్ ఫీల్డ్ రాజధాని నగర (Amaravati Capital Development) నిర్మాణ పనులను ప్రధాని న‌రేంద్ర మోదీ (PM Modi) మళ్లీ ప్రారంభించనున్నారు. ఆంధ్రప్రదేశ్ ప్రభుత్వ ప్రధాన కార్యదర్శి కె. విజయానంద్ ఈ మేర‌కు ప్ర‌క‌టించారు. సుమారు రూ. లక్ష కోట్ల అంచనా వ్య‌యంతో ఈ ప్రాజెక్టును చేప‌డుతున్నారు.
రాజధాని ప్రాంత అభివృద్ధి సంస్థ (CRDA) కమిషనర్ కె. కన్నా బాబు, సింగపూర్ ప్రభుత్వ ప్రతినిధులతో సచివాలయంలో జరిగిన సమావేశంలో ఈ వివరాలను వెల్లడించారు. ఈ సమావేశంలో అమరావతి నగర నిర్మాణానికి సంబంధించిన పలు అంశాలపై చర్చ జరిగింది. గతంలో 2014 నుంచి 2019 మధ్య కాలంలో సింగపూర్ ప్రభుత్వం అమరావతి అభివృద్ధిలో కీలక భాగస్వామిగా వ్యవహరించిన విషయం తెలిసిందే.
సింగపూర్ భాగ‌స్వామ్యంతో..
ప్రధాని మోదీ ఈ నెలలో రాష్ట్రాన్ని సందర్శించి, అమరావతి రాజధాని (Amaravati Capital) పనులను మళ్లీ ప్రారంభించనున్నారు. ఈ ప్రాజెక్ట్‌కు మద్దతు ఇవ్వాలని సింగపూర్ ప్రభుత్వాన్ని కోరారు. ఈ విషయమై సింగపూర్ ప్రభుత్వం సానుకూలంగా స్పందించినట్లు అధికారిక ప్రకటనలో పేర్కొన్నారు. సింగపూర్ ప్రభుత్వం గతంలో ప్ర‌క‌టించిన భాగ‌స్వామ్మాన్ని (Singapore Collaboration) పునరుద్ధరించేందుకు ప్రభుత్వం కృషి చేస్తుందని సింగపూర్ ప్రతినిధి ఫ్రాన్సిస్ చోంగ్ తెలిపారు.
217 చదరపు కిలోమీటర్ల విస్తీర్ణం
అమరావతి అభివృద్ధికి నిధుల కొరత లేదని ప్రభుత్వ ప్రధాన కార్యదర్శి విజయానంద్ స్పష్టం చేశారు. ప్రపంచ బ్యాంకు, హడ్కో (HUDCO), ఆసియన్ డెవలప్‌మెంట్ బ్యాంక్ (ADB) వంటి అంతర్జాతీయ సంస్థల నుండి భారీగా ఆర్థిక మద్దతు పొందినట్లు తెలిపారు. ప్రభుత్వ ప్రణాళికల ప్రకారం అమరావతిని 217 చదరపు కిలోమీటర్ల విస్తీర్ణంలో వేగంగా అభివృద్ధి చేస్తుండటంతోపాటు అనేక ముఖ్యమైన ప్రాజెక్టులకు టెండర్లు ఇప్పటికే ఆహ్వానించబడ్డాయి.
భారీ నిధుల స‌మీక‌ర‌ణ
ప్రస్తుత అభివృద్ధి ప్రణాళికల్లో భాగంగా ప్రభుత్వ సముదాయ నిర్మాణం, ప్రధాన రహదారులు, ఇతర మౌలిక సదుపాయాల అభివృద్ధికి భారీగా నిధులు (Funding for Amaravati) సమీకరించామని కన్నా బాబు వివరించారు. ప్రధాని మోదీ తన సందర్శనలో రూ. లక్ష కోట్ల విలువైన పలు ప్రాజెక్టులను ప్రారంభించడంతోపాటు కొత్త అభివృద్ధి కార్యక్రమాలకు శంకుస్థాపన చేయనున్నారు.
మౌలిక సౌకర్యాలకు ప్రాధాన్యం
ఈ ప్రాజెక్ట్‌తో అమరావతి (Amaravati) ని ఒక అంతర్జాతీయ స్థాయిలో అభివృద్ధి చేయడానికి ప్రభుత్వం కట్టుబడి ఉందని రాష్ట్ర ప్రభుత్వ ప్రతినిధులు తెలియజేశారు. గతంలో తలపెట్టిన అభివృద్ధి ప్రణాళికలను తిరిగి ప్రారంభించడంతో పాటు కొత్త మౌలిక సదుపాయాల నిర్మాణంపై కూడా ప్రాధాన్యమివ్వనున్నారు. అమరావతి నగరాన్ని ఒక ప్రపంచ స్థాయి రాజధానిగా తీర్చిదిద్దేందుకు ప్రభుత్వం శక్తివంచన లేకుండా కృషి చేస్తోంది. సింగపూర్ ప్రభుత్వం ఈ ప్రాజెక్టులో భాగస్వామ్యం అయ్యేందుకు ఆసక్తి చూపిస్తున్నట్లు అధికారిక ప్రకటన పేర్కొంది. అమరావతిలోని ప్రధాన మౌలిక సదుపాయాలను అభివృద్ధి చేయడానికి సింగపూర్ తోపాటు ఇతర అంతర్జాతీయ సంస్థల సహకారాన్ని తీసుకునే అవకాశం ఉందని అధికారులు తెలియజేశారు. ప్రభుత్వ ముఖ్య ప్రణాళికల్లో భాగంగా, రోడ్లు, వంతెనలు, ఇంటిగ్రేటెడ్ గవర్నమెంట్ కాంప్లెక్స్, పారిశ్రామిక వృద్ధి కేంద్రాలు, నివాస సముదాయాలు మరియు ఇతర మౌలిక సదుపాయాల నిర్మాణంపై దృష్టి పెట్టనున్నారు.
పెర‌గ‌నున్న ఉపాధి అవకాశాలు
ఈ ప్రాజెక్ట్ అమలు కావడం ద్వారా అమరావతిలో ఉపాధి అవకాశాలు పెరిగే అవకాశం ఉంది. పరిశ్రమలు, ఐటీ సంస్థలు, వాణిజ్య సెంటర్ల అభివృద్ధికి మరింత ఊతమిస్తుందని ప్రభుత్వ వర్గాలు భావిస్తున్నాయి. అమరావతి నగర నిర్మాణం పూర్తయిన తర్వాత, ఇది దేశంలోనే అత్యధునిక, ఆకర్షణీయమైన రాజధానులలో ఒకటిగా మారనుంది.
రైతులకు సరైన ప‌రిహారం ల‌భించేనా?
అమరావతి రాజధాని నిర్మాణాన్ని పూర్తిస్థాయిలో కొనసాగించాలని కోరుతూ వివిధ వర్గాలు ప్రభుత్వంపై ఒత్తిడి తెస్తున్నాయి. రైతులు, వ్యాపార వర్గాలు, సామాజిక కార్యకర్తలు అమరావతి అభివృద్ధి పునఃప్రారంభంపై సంతోషం వ్యక్తం చేస్తున్నారు. గతంలో అమరావతి నిర్మాణ పనులు మధ్యలో ఆగిపోయిన నేపథ్యంలో మళ్లీ పనులు మొదలవుతున్నాయనే వార్త ప్రజల్లో విశేష ఉత్సాహాన్ని రేకెత్తించింది.సామాజిక, పారిశ్రామిక, రాజకీయ రంగాల నుంచి కూడా అమరావతి అభివృద్ధిపై మద్దతు లభిస్తోంది. ముఖ్యంగా ఇక్కడ సమీకరించిన భూములను రైతులకు (Farmers’ Land Compensation) సరైన ప‌రిహారం ల‌భించేలా ప్రభుత్వమే ప్రత్యేక దృష్టి సారించాల్సిన అవసరం ఉందని పలువురు అభిప్రాయపడుతున్నారు.
తెలుగు వార్తలు, ప్రత్యేక కథనాలు, ట్రెండింగ్ వీడియోల కోసం సర్కార్ లైవ్ వెబ్ సైట్ ను సందర్శించండి. అలాగే మా ఫేస్ బుక్,వాట్సప్ చానల్, ఎక్స్(ట్విట్టర్) ను ఫాలో అవండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు..
