ATM cash withdrawal : మీరు డ‌బ్బు డ్రా చేసుకునేందుకు ATMలను ఉపయోగిస్తుంటే, ఈ తాజా వార్త మీరు తెలుసుకోవాల్సిందే.. ఐదు ఉచిత లావాదేవీల పరిమితిని దాటినప్పుడు బ్యాంకులు వసూలు చేసే గరిష్ట రుసుము, ATM ఇంటర్‌చేంజ్ రుసుమును పెంచాలని రిజర్వ్ బ్యాంక్ ఆఫ్ ఇండియా (RBI) పరిశీలిస్తోంది. ఆంగ్ల‌మీడియా క‌థ‌నాల ప్ర‌కారం.. ఇక‌పై బ్యాంకింగ్ కస్టమర్లు ATMల నుంచి నగదు డ్రా చేసుకునేట‌పుడు ఎక్కువ రుసుము చెల్లించాల్సి ఉంటుంది. ముఖ్యంగా, ఈ ఛార్జీల పెరుగుదలతో బ్యాంకింగ్ కస్టమర్లు ATMల నుంచి నగదు తీసుకోవడానికి వారి స్వంత జేబుల నుంచి ఎక్కువ డబ్బు ఖర్చు చేయాల్సి వస్తుంది.

ATM cash withdrawal చార్జీలు

ఐదు ఉచిత పరిమితి పూర్తయిన తర్వాత, నేషనల్ పేమెంట్స్ కార్పొరేషన్ ఆఫ్ ఇండియా (NPCI) గరిష్ట నగదు లావాదేవీ రుసుమును ప్రస్తుత స్థాయి అయిన ప్రతి లావాదేవీకి రూ.21 నుంచి రూ.22కి పెంచాలని సిఫార్సు చేసింది. చెల్లింపుల నియంత్రణ సంస్థ NPCI, పరిశ్రమతో సంప్రదించిన తర్వాత, నగదు లావాదేవీల కోసం ATM ఇంటర్‌చేంజ్ రుసుమును రూ.17 నుంచి రూ.19కి పెంచాలని కూడా సిఫార్సు చేసింది. నగదు రహిత లావాదేవీల రుసుమును రూ.6 నుండి రూ.7కి పెంచాలని సిఫార్సు చేసింది.

ATM ఇంటర్‌చేంజ్ ఫీజు ఎంత?

ATM ఇంటర్‌చేంజ్ ఫీజు అనేది ATM సేవలను ఉపయోగించినందుకు ఒక బ్యాంకు మరొక బ్యాంకుకు చెల్లించే రుసుము. ఈ రుసుము సాధారణంగా లావాదేవీలో ఒక శాతంగా ఉంటుంది. తరచుగా కస్టమర్ బిల్లుకు జోడించబడుతుంది. మెట్రో, నాన్-మెట్రో ప్రాంతాలకు రుసుమును పెంచే NPCI ఆలోచ‌న‌తో బ్యాంకులు, వైట్-లేబుల్ ATM ఆపరేటర్లు ఏకీభవిస్తున్నారు. అయితే ఈ అంశంపై రిజర్వ్ బ్యాంక్ ఆఫ్ ఇండియాతోపాటు NPCI ఇప్ప‌టివ‌ర‌కు ఏ ప్ర‌క‌ట‌న చేయ‌లేదు.

తెలుగు వార్తలు, ప్రత్యేక కథనాలు, ట్రెండింగ్ వీడియోల కోసం  సర్కార్ లైవ్ వెబ్ సైట్ ను సందర్శించండి.  అలాగే మా  ఫేస్ బుక్,వాట్సప్ చానల్, ఎక్స్(ట్విట్టర్)  ను  ఫాలో అవండి.  మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు..