Deepfakes : దేశంలో డీప్‌ఫేక్స్ (Deepfakes), కృత్రిమ మానవీయ మీడియా (synthetic media) ద్వారా జరిగే మోసాలు, అభద్రతలకు పాల్పడుతున్న క్రిమినల్ చర్యలను అరికట్టేందుకు కేంద్ర ప్రభుత్వం (Centre) మరోసారి సోషల్ మీడియా ప్లాట్‌ఫారాల (social media platforms)ను హెచ్చరించింది. దేశ ప్రజలకు నమ్మకమైన, భద్రమైన, బాధ్యతాయుతమైన డిజిటల్ వాతావరణాన్ని అందించాలనే లక్ష్యంతో ప్రభుత్వం ఈ చర్యలు తీసుకుంటోంది.
డీప్‌ఫేక్ (Deepfakes) అంటే ఏమిటి?
డీప్‌ఫేక్ (Deepfakes) అనేది ఆర్టిఫిషియల్ ఇంటెలిజెన్స్ (AI) ఆధారంగా తయారు చేసిన వీడియో లేదా ఆడియో. ఇందులో నిజంగా ఎవరూ మాట్లాడని మాటలు, చేయని చర్యలు ప్రోగ్రామ్ ద్వారా రూపొందించబడతాయి. ఎవరైనా ప్రసిద్ధ వ్యక్తి మాట్లాడినట్లు చూపించడం, వారు చేయనిది చేసినట్లు చూపించడం డీప్‌ఫేక్ అనే పద్ధతిలో సాధ్యమవుతుంది. ఇలాంటి ఫేక్ వీడియోలు, ఆడియోలు సోషల్ మీడియా ద్వారా విస్తృతంగా వ్యాప్తి చెందుతున్నాయి. ఇవి ప్రజల్లో అవాస్త‌వాల‌ను ప్రచారం చేస్తున్నాయని కేంద్రం గుర్తించింది. ఈ చ‌ర్య వ‌ల్ల సమాజం మీద, ప్రజల భద్రత, దేశ రాజకీయం మీద కూడా ప్రభావం ప‌డుతుంద‌ని భావిస్తోంది. ఈ నేప‌థ్యంలో డీప్‌ఫేక్స్ (Deepfakes) పట్ల చర్యలు తీసుకోవాలని సోషల్ మీడియా సంస్థలకు కేంద్రం సూచించింది.
IT మంత్రిత్వ శాఖ సూచనలు
కేంద్ర ఐటీ మంత్రిత్వ శాఖ (IT Ministry) ఇప్పటి వరకు ఎన్నో సమావేశాలను ఏర్పాటు చేసి పరిశ్రమల ప్రతినిధులతో డీప్‌ఫేక్స్ సమస్యపై చర్చించింది. డీప్‌ఫేక్స్ (Deepfakes) ఎలా రూపుదిద్దుకుంటున్నాయో, వాటిని ఎలా గుర్తించాలో, అరికట్టాలో సమగ్రమైన అవగాహనకు వ‌చ్చారు. 2021లో రూపొందించిన ఐటీ నిబంధనల ప్రకారం (IT Rules 2021), సోషల్ మీడియా ప్లాట్‌ఫారాలు కొన్ని నిర్దిష్ట బాధ్యతలు కలిగి ఉండాలి. అవి ఏమైనా చట్ట విరుద్ధమైన సమాచారం తమ ప్లాట్‌ఫారంలో పోస్ట్, స్టోర్ లేదా ప్రచారం చేయకూడదు. దీని ఆధారంగా డీప్‌ఫేక్స్‌పై ఎలాంటి చర్యలు తీసుకోవ‌చ్చో స‌మాలోచ‌న చేశారు. చట్ట విరుద్ధమైన సమాచారం గుర్తించిన తర్వాత వెంటనే తీసివేయాల్సిన బాధ్యత ఆ సంస్థలదేన‌ని అభిప్రాయ‌పడ్డారు. ఇది సంబంధిత ప్రభుత్వ విభాగం లేదా బాధితుల నుంచి వచ్చిన ఫిర్యాదుల ఆధారంగా అమలు చేయాలని నిర్ణ‌యించారు.
Deepfakes : గ్రీవెన్స్ కమిటీల ఏర్పాటు
ఐటీ నియమాలు 2021 కింద ప్రభుత్వం ప్రత్యేకంగా గ్రీవెన్స్ అప్పీల్స్ కమిటీలను (Grievance Appellate Committees) ఏర్పాటు చేసింది. వినియోగదారులు లేదా బాధితులు ఈ కమిటీలకు www.gac.gov.in వెబ్‌సైట్ ద్వారా ఆన్‌లైన్‌లో ఫిర్యాదు చేయొచ్చు. ఒకవేళ సోషల్ మీడియా సంస్థల గ్రీవెన్స్ ఆఫీసర్ నిర్ణయం అసంతృప్తికరంగా ఉంటే, వినియోగదారులు ఈ కమిటీ వద్ద అప్పీల్ చేసుకోవచ్చు.
CERT-In హెచ్చరికలు.. సూచనలు
సైబర్ భద్రతకు సంబంధించి దేశంలోని ప్రధాన సంస్థగా ఉన్న ఇండియన్ కంప్యూటర్ ఎమర్జెన్సీ రెస్పాన్స్ టీం (CERT-In) తరచూ హెచ్చరికలు, సూచనలు జారీ చేస్తూ ఉంది. AI ఆధారంగా జరుగుతున్న దాడులు, ప్రమాదాలను అరికట్టేందుకు ఈ సంస్థ కంప్యూటర్లకు, నెట్‌వర్కులకు, డేటాకు సంబంధించి రక్షణ చర్యలను సూచిస్తుంది. అంతేకాకుండా, సోషల్ మీడియా సంస్థలు కూడా తమ ప్లాట్‌ఫారాల్లో ఉండే కృత్రిమ మీడియా గురించి త్వరగా గుర్తించి తొలగించే విధంగా వ్యవస్థలు ఏర్పాటు చేయాలని కేంద్రం కోరుతోంది.
దేశ భద్రతకు ముప్పు !
డీప్‌ఫేక్‌లు కేవలం వ్యక్తిగత పరువు నష్టం వద్దనే ఆగడం లేదు. ఇవి చట్ట విరుద్ధ కృత్యాలకు, మోసాలకు దారితీసే ప్రమాదం ఉంది. కొన్ని సందర్భాల్లో డీప్‌ఫేక్స్ వీడియోల ద్వారా రాజకీయ నాయకులను పరువుపోయేలా చూపించడం, జాతిపిత మహాత్మా గాంధీ వంటి మహానుభావులను తప్పుదారి పట్టించేలా చూపించడం కూడా చేశారు. ఇది ప్రజల్లో గందరగోళం కలిగిస్తున్నాయి.
తెలుగు వార్తలు, ప్రత్యేక కథనాలు, ట్రెండింగ్ వీడియోల కోసం సర్కార్ లైవ్ వెబ్ సైట్ ను సందర్శించండి. అలాగే మా ఫేస్ బుక్,వాట్సప్ చానల్, ఎక్స్(ట్విట్టర్) ను ఫాలో అవండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు.
