ఎంపీటీసీ, జడ్పీటీసీ ఎన్నికలపై కాంగ్రెస్ ఫోకస్
MPTC ZPTC elections | తెలంగాణలో స్థానిక సంస్థల ఎన్నికలపై రాజకీయ కదలికలు వేగం పెంచుకున్నాయి. మండల పరిషత్ (MPTC), జిల్లా పరిషత్ (ZPTC) ఎన్నికలను మే నెల చివర్లో లేదా జూన్ మొదటి వారంలో నిర్వహించే అవకాశం ఉన్నట్లు తెలుస్తోంది. సీఎం రేవంత్ రెడ్డి నుంచి ఈ మేరకు పీసీసీకి స్పష్టమైన సంకేతాలు వెళ్లినట్లు పార్టీ వర్గాలు చెబుతున్నాయి. దీంతో కాంగ్రెస్ పార్టీ ముందస్తు వ్యూహాలతో రంగంలోకి దిగింది.
ఎన్నికల టైమింగ్పై క్లారిటీ
ఫిబ్రవరి నుంచి ఏప్రిల్ వరకు పదో తరగతి, ఇంటర్, డిగ్రీ పరీక్షలు ఉండటంతో ప్రభుత్వం ఇప్పటివరకు ఎన్నికలపై ముందడుగు వేయలేదు. అదనంగా ఇతర రాష్ట్రాల్లో ఎన్నికలు కూడా ముగియనున్న నేపథ్యంలో మే చివర్లో లేదా జూన్ ప్రారంభంలో ఎన్నికలు నిర్వహించడం అనుకూలంగా ఉంటుందని భావిస్తోంది.
MPTC ZPTC elections : క్యాడర్ను అలర్ట్ చేస్తున్న పీసీసీ
ఈ ఎన్నికలను దృష్టిలో పెట్టుకుని పీసీసీ చీఫ్ మహేశ్ గౌడ్ జిల్లాల పర్యటనలు ప్రారంభించారు. పార్టీ నాయకులకు స్పష్టమైన సందేశం ఇస్తూ — పైరవీలతో టికెట్లు రావని, జనంలో పనిచేసే వారికే ప్రాధాన్యం ఉంటుందని చెబుతున్నారు. స్థానిక సమస్యలపై ఫోకస్ పెట్టి పార్టీని బలోపేతం చేయాలని సూచిస్తున్నారు.
ఈసారి ఎంపీటీసీ, జడ్పీటీసీ ఎన్నికల్లో 80 శాతం స్థానాలు గెలుచుకోవడమే కాంగ్రెస్ లక్ష్యంగా పెట్టుకుంది. సర్వేల ఆధారంగా అభ్యర్థులను ఎంపిక చేసి, ప్రజాదరణ ఉన్నవారికే టికెట్లు ఇవ్వాలని నిర్ణయించింది. డీసీసీ చీఫ్లు, మంత్రులు, ఎమ్మెల్యేలు సమన్వయంతో పనిచేయాలని పీసీసీ ఆదేశాలు జారీ చేసింది.
అంతర్గత సమస్యలపై ఫోకస్
పార్టీ బలోపేతానికి కీలకమైన అంశాలపై కూడా దృష్టి పెట్టింది. పాత, కొత్త నాయకుల మధ్య విభేదాలు, నియోజకవర్గ స్థాయి సమన్వయం లోపాలను పరిష్కరించే దిశగా చర్యలు తీసుకుంటోంది. బూత్ స్థాయిలో పార్టీని బలపరచడంపై కూడా సమీక్షలు నిర్వహిస్తోంది.
పీసీసీ చీఫ్ స్వయంగా జిల్లాల్లో పర్యటిస్తూ పార్టీ కమిటీలతో సమావేశాలు నిర్వహించడం, ఎన్నికల వ్యూహాలు వివరించడం వల్ల కాంగ్రెస్ క్యాడర్లో కొత్త ఉత్సాహం కనిపిస్తోంది. రాష్ట్రవ్యాప్తంగా ఎన్నికల వాతావరణం నెలకొంటుండగా కార్యకర్తలు సిద్ధమవుతున్నారు.
తెలుగు వార్తలు, ప్రత్యేక కథనాలు, ట్రెండింగ్ వీడియోల కోసం సర్కార్ లైవ్ వెబ్ సైట్ ను సందర్శించండి. అలాగే మా వాట్సప్ చానల్, ఎక్స్(ట్విట్టర్) ను ఫాలో అవండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు.
