Pushpa 2 box office | అల్లు అర్జున్ పుష్ప 2 రికార్డులు బ‌ద్ద‌లు కొడుతోంది. రష్మిక మందన్న, ఫహద్ ఫాసిల్ నటించిన ఈ బ్లాక్ బ‌స్ట‌ర్ మూవీ.. గ‌త సినిమాల వసూళ్ల రికార్డుల‌ను మూడు రోజుల్లోనే అధిగమించింది. అంతర్జాతీయంగా అత్యంత వేగంగా రూ. 600 కోట్లకు చేరుకున్న భారతీయ చిత్రంగా పుష్ప 2 నిలిచింది.

ప్రాథ‌మిక‌ అంచనాల ప్రకారం ఈ సినిమా మూడు రోజుల్లో ఇండియాలో రూ.383 కోట్లు వసూలు చేసింది. శనివారం ఈ చిత్రం భారతదేశంలో దాదాపు రూ. 115.58 కోట్ల నికర వసూళ్లు సాధించింది. శుక్రవారం వసూళ్లను అధిగమించి మొత్తం రూ. 383.7 కోట్లకు చేరుకుంది.

హిందీ వెర్షన్ అత్యధికంగా రూ.73.5 కోట్లు, తెలుగు వెర్షన్ రూ.31.5 కోట్లు, తమిళ వెర్షన్ రూ.7.5 కోట్లు వసూలు చేసింది. శుక్రవారం నాడు పుష్ప 2 రూ.93.8 కోట్లు వసూలు చేసింది. ఈ చిత్రం ప్రపంచ వ్యాప్తంగా రూ.600 కోట్లకు పైగా వసూలు చేసిందని ట్రేడ్ విశ్లేషకులు చెబుతున్నారు.

పుష్ప: ది రూల్ భారతీయ బాక్సాఫీస్ వద్ద మొదటి రోజు రికార్డులను బద్దలు కొట్టింది. SS రాజమౌళి తీసిన‌ RRRని అధిగమించి, ఏ భారతీయ సినిమాకైనా గొప్ప ఓపెనింగ్‌గా నిలిచింది. ఇది అట్లీ ద‌ర్శ‌క‌త్వంలో వ‌చ్చిన‌ జవాన్‌ను అధిగమించి బాలివుడ్ అత్యధిక ఓపెనింగ్స్‌గా రికార్డ్‌ను కూడా తిర‌గ‌రాసింది.

రెండు భాషల్లో ఒకే రోజు రూ.50 కోట్లకు పైగా వసూళ్లు సాధించిన తొలి చిత్రంగా నిలిచింది పుష్ప 2. ఇప్పటికే అత్యధిక వసూళ్లు చేసిన చిత్రంగా నిలిచిన ఈ సినిమా ఈ వారాంతంలో ఇది మరిన్ని రికార్డులను బద్దలు కొడుతుందని భావిస్తున్నారు.