Numaish 2025 : హైదరాబాద్లో ఏర్పాటు చేసిన నూమాయిష్ (Numaish)లో స్టార్టప్‌లను ప్రోత్సహించే ఓ వినూత్న హ‌బ్‌ను ఏర్పాటు చేశారు. టీ-హబ్ (T-Hub) ఈసీవో సుజిత్ జాగిర్దార్ దీనిని ఈ రోజు ప్రారంభించారు. స్టార్టప్‌ల ద్వారా యువ పారిశ్రామికవేత్త‌లు రూపొందించిన ఉత్పత్తులను ప్ర‌ద‌ర్శించ‌డానికి, వాటిని విక్రయించడానికి ఈ హబ్ దోహ‌ద‌ప‌డుతుంద‌ని నుమాయిష్ నిర్వాహకులు అంటున్నారు. సేవా రంగంలో రూపాంత‌రం చెందిన స్టార్ట‌ప్ (Startups)లపై ప్రజలకు అగాహ‌న కల్పిస్తూ వాటిని అందుబాటులోకి తేవ‌డం కూడా దీని ముఖ్యోద్దేశ‌మ‌ని తెలిపారు. ఈ కొత్త కార్యక్రమం ద్వారా స్టార్టప్‌ల ప్రతిభను ప్రదర్శించి, ప్రజలకు చేరువకావ‌డానికి ఇది మంచి అవకాశమ‌ని అంటున్నారు.
30 స్టార్టప్‌లకు అవకాశం
రాష్ట్ర ఐటీ మంత్రిత్వ శాఖ, టీ-హబ్ స‌హ‌కారంతో ఆల్ ఇండియా ఇండస్ట్రియల్ ఎగ్జిబిషన్ (AIIE) సొసైటీ ఆధ్వ‌ర్యంలో హైదరాబాద్లో నూమాయిష్ (Exhibition) న‌డుస్తోంది. ఇందులో 30కి పైగా స్టార్టప్‌ల (Startups)కు ప్రతివారం రోటేషన్ పద్ధతిలో ప్రదర్శించడ‌మే కాకుండా వాటి విక్రయాల కోసం అవకాశం కల్పించ‌నున్నారు. స్టార్టప్‌లను ప్రోత్సహించడంలో భాగంగా నూమాయిష్‌లో వాటి కోసం ప్రత్యేక స్థలాన్ని ఉచితంగా కేటాయించారు.
టీ-హబ్ భాగస్వామ్యంతో..
టీ-హబ్ భాగస్వామ్యంతో నూమాయిష్ ఒక కొత్త ప్రయాణాన్ని ప్రారంభించింది. సాంకేతికతను, వినూత్నతను ఒకే వేదికపైకి తీసుకురావడం ద్వారా స్టార్టప్‌లు, వ్యాపారాలకు మ‌ద్ద‌తు ల‌భిస్తోంది. భవిష్యత్‌లో మరిన్ని స్టార్టప్‌లను ప్రోత్సహించేందుకు, వాటికి మరింత పెద్ద స్థాయిలో అవకాశం కల్పించ‌డానికి నూమాయిష్‌లోని ఈ హబ్ ఎంతో దోహ‌ద‌ప‌డుతుంద‌నే అభిప్రాయాలు వ్య‌క్త‌మ‌వుతున్నాయి.
Numaish 2025 లో భారీగా టికెట్ల విక్రయాలు
నూమాయిష్ (ఎగ్జిబిషన్)కు ఈ సంవత్సరం సందర్శ‌కులు గ‌ణ‌నీయంగా పెరిగార‌ని నిర్వాహకులు తెలిపారు. గత సంవత్సరంతో పోలిస్తే 25 వేల‌కు పైగా టికెట్లు అద‌నంగా విక్రయాలు జ‌రిగాయ‌ని అంటున్నారు.
ఈ-కామర్స్ ఉన్నా త‌గ్గ‌ని ఆద‌ర‌ణ
ఈ-కామర్స్ (e-commerce) వృద్ధితో ప్రపంచంలోని ఎక్కడి నుంచి ఏవైనా ఉత్పత్తులను కొనడం సులభత‌ర‌మైంది. అయినప్పటికీ నూమాయిష్‌లో వ్యాపారంపై ఎలాంటి ప్రభావం లేదని సెక్రటరీ స్పష్టంగా తెలిపారు. ప్రజలు నూమాయిష్‌లో ప్రత్యక్షంగా ఉత్పత్తులను చూడ్డానికి, కొనుగోలు చేయ‌డానికి ఇష్టపడుతున్నార‌ని తెలిపారు.
నూమాయిష్ ఎప్ప‌టి వరకు ఉంటుంది?
హైదరాబాద్ (Hyderabad) నూమాయిష్ ఫిబ్రవరి వరకు కొనసాగనుంది. మొదట ఫిబ్రవరి 15న ముగించాలనే నిర్ణయం తీసుకున్నప్పటికీ, జనవరి 1కి బదులుగా జనవరి 3న ప్రారంభం కావడంతో దీన్ని మరింత పొడిగించారు.
Numaish ప్రత్యేకత ఏమిటి?
- ప్రదర్శనలు: ప్రదర్శనలో ఉత్పత్తులను ప్రత్యక్షంగా చూసే అవకాశం కలిగి ఉండటం ఈ ఎగ్జిబిషన్ ప్రత్యేకత.
- వ్యాపార మేళా: స్టార్టప్‌లు తమ సేవలను నేరుగా వినియోగదారులకు చేరువ చేయగలగడం ద్వారా వ్యాపారానికి ఊతమిస్తుంది.
- సాంస్కృతిక అనుబంధం: నూమాయిష్‌కు ప్రత్యేక సాంస్కృతిక ప్రాముఖ్యత ఉండటంతో ఇది అనేక కుటుంబాలకు ప్రత్యేక అనుభవాన్ని అందిస్తోంది.
తెలుగు వార్తలు, ప్రత్యేక కథనాలు, ట్రెండింగ్ వీడియోల కోసం సర్కార్ లైవ్ వెబ్ సైట్ ను సందర్శించండి. అలాగే మా ఫేస్ బుక్,వాట్సప్ చానల్, ఎక్స్(ట్విట్టర్) ను ఫాలో అవండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు..
