TSLPRB : తెలంగాణ రాష్ట్ర స్థాయి పోలీసు నియామక మండలి (TSLPRB) ఓ ముఖ్యమైన ప్రకటన చేసింది. రాష్ట్ర ప్రాసిక్యూషన్‌ విభాగంలో ఖాళీగా ఉన్న అసిస్టెంట్ పబ్లిక్ ప్రాసిక్యూటర్ ఉద్యోగాలను భర్తీ చేయనున్నట్లు పేర్కొంది. దీనికి సంబంధించిన నోటిఫికేషన్ త్వరలోనే విడుదల చేయ‌నుంది. దీని ద్వారా మొత్తం 118 పోస్టులు భర్తీ చేయనున్న‌ట్టు TSLPRB తెలిపింది. న్యాయ విద్య పూర్తిచేసి, ఉద్యోగం కోసం ఎదురుచూస్తున్న వేలాది మంది అభ్యర్థులకు సువ‌ర్ణావ‌కాశ‌మ‌ని పేర్కొంది.
TSLPRB Jobs 2025 : మొత్తం ఖాళీల వివరాలు
మల్టీ జోన్ – I
- 38 పోస్టులు ప్రత్యక్ష నియామకంతో భర్తీ చేస్తారు.
- 12 పోస్టులు లిమిటెడ్‌ రిక్రూట్‌మెంట్‌ (బ్యాక్‌లాగ్‌) ద్వారా భర్తీ చేయనున్నారు.
మల్టీ జోన్ – II
- 57 పోస్టులు ప్రత్యక్ష నియామకంతో భర్తీ చేస్తారు.
- 11 పోస్టులు లిమిటెడ్‌ రిక్రూట్‌మెంట్‌ కింద భర్తీ అవుతాయి.
ఇలా మొత్తం 118 మందిని నియ‌మించ‌నున్నారు.
దరఖాస్తు విధానం
అభ్యర్థులు త‌ప్ప‌నిస‌రిగా అధికారిక వెబ్‌సైట్ ద్వారానే త‌మ ద‌ర‌ఖాస్తుల‌ను స‌మ‌ర్పించాల్సి ఉంటుంద‌ని TSLPRB చైర్మన్ శ్రీనివాసరావు తెలిపారు. ఆఫ్‌లైన్‌ ద్వారా లేదా ఇతర మార్గాల్లో దరఖాస్తులు స్వీకరించబోమ‌ని పేర్కొన్నారు. దరఖాస్తు ప్రారంభ తేదీలు, చివరి తేదీ, ఫీజు వివరాలు తదితర సమాచారం త్వరలోనే అధికారిక వెబ్‌సైట్‌లో అందుబాటులో ఉంచనున్న‌ట్టు తెలిపారు. అభ్యర్థులు నోటిఫికేషన్ పూర్తిగా చదివి, అర్హతలు, వయస్సు పరిమితులు, సర్టిఫికెట్లు మొదలైనవి సరిచూసుకుని దరఖాస్తు చేయాల్సి ఉంటుంద‌ని వివ‌రించారు.
TSLPRB : నియామకానికి ఉన్న ప్రాముఖ్యత
ప్రాసిక్యూషన్‌ విభాగం అంటే న్యాయస్థానాల్లో ప్రభుత్వ తరఫున కేసులు నడిపే న్యాయవాదులు. రాష్ట్రంలో నేరాలను ఎదుర్కోవడం, న్యాయవ్యవస్థను బలోపేతం చేయడంలో ఈ విభాగానికి ఎంతో ప్రాధాన్యం ఉంది.
అనుభవం కలిగిన, అర్హత పొందిన న్యాయవాదులు ఈ పోస్టుల ద్వారా ప్రభుత్వ సేవలో చేరొచ్చు.
అర్హులు ఎవరు?
- విద్యార్హతలు: అసిస్టెంట్ పబ్లిక్ ప్రాసిక్యూటర్ల ఉద్యోగానికి దరఖాస్తు చేయాల్సిన వారు న్యాయశాస్త్రంలో డిగ్రీ పూర్తి చేసి ఉండాలి. న్యాయవాదిగా ప్రాక్టీస్‌ చేసిన అనుభవం ఉన్నవారికి ప్రాధాన్యం ఉంటుంది.
- వ‌యో పరిమితి: వయసు సంబంధించిన అర్హతలు నోటిఫికేషన్‌లో స్పష్టంగా ఇస్తారు. సాధారణంగా ప్రభుత్వ నియమాల ప్రకారం SC, ST, BC, EWS, PH అభ్యర్థులకు స‌డ‌లింపు ఉంటుంది.
ఎంపిక విధానం
లిఖితపరీక్ష, ఇంటర్వ్యూ ద్వారా ఎంపిక ఉంటుంది. వీటిలో ఉత్తీర్ణ‌త సాధించిన వారి స‌ర్టిఫికెట్ల‌ను వెరిఫికేష‌న్ చేస్తారు. త‌ద్వారా ఉద్యోగానికి ఎంపిక చేస్తారు.
మొత్తంగా TSLPRB విడుదల చేసిన 118 అసిస్టెంట్ పబ్లిక్ ప్రాసిక్యూటర్ పోస్టుల నోటిఫికేషన్ న్యాయ విద్యార్థులకు, న్యాయవాదులకు ఒక పెద్ద శుభవార్త. ఈ నియామకాలతో రాష్ట్ర ప్రాసిక్యూషన్‌ విభాగం బలపడటమే కాకుండా న్యాయవ్యవస్థ మరింత సమర్థంగా పనిచేసే అవకాశం ఉంది.
తెలుగు వార్తలు, ప్రత్యేక కథనాలు, ట్రెండింగ్ వీడియోల కోసం సర్కార్ లైవ్ వెబ్ సైట్ ను సందర్శించండి. అలాగే మా ఫేస్ బుక్,వాట్సప్ చానల్, ఎక్స్(ట్విట్టర్) ను ఫాలో అవండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు.
