రాజకీయ నేత కవిత ప్రతిపాదించిన ‘తెలంగాణ రక్షణ సేన’ (TRS) పార్టీకి ఆరంభంలోనే ఈసీ (ఎన్నికల సంఘం) వద్ద చుక్కెదురవుతోంది. పార్టీ సంక్షిప్త నామంగా ‘టీఆర్ఎస్’ అనే అక్షరాలను కేటాయించవద్దంటూ కేంద్ర ఎన్నికల సంఘానికి పెద్ద ఎత్తున అభ్యంతరాలు వ్యక్తమవుతుండటంతో ఈ అంశం ఇప్పుడు తెలుగు రాష్ట్రాల్లో హాట్ టాపిక్గా మారింది.
బీఆర్ఎస్ తీవ్ర అభ్యంతరం
కవిత కొత్త పార్టీకి ‘టీఆర్ఎస్’ పేరును ఉపయోగించడంపై భారత్ రాష్ట్ర సమితి (BRS) తీవ్రస్థాయిలో మండిపడుతోంది. ఈ మేరకు ఈసీకి తన అభ్యంతరాలను తెలియజేసింది.
’టీఆర్ఎస్’ అనే పేరు తెలంగాణ ఉద్యమ చరిత్రతో, ప్రజల భావోద్వేగాలతో ముడిపడి ఉందని బీఆర్ఎస్ వాదిస్తోంది.
గ్రామీణ ప్రాంతాల్లో ప్రజలు ఇప్పటికీ తమ పార్టీని ‘టీఆర్ఎస్’ గానే గుర్తిస్తున్నారని, ఈ పేరును వేరే సంస్థకు కేటాయిస్తే ఓటర్లు గందరగోళానికి గురయ్యే ప్రమాదం ఉందని పేర్కొంది.
రేసులో మరో రెండు సంస్థలు
కవిత పార్టీ కంటే ముందే ‘టీఆర్ఎస్’ సంక్షిప్త నామం కోసం ఇతర సంస్థలు కూడా లైన్లో ఉండటం గమనార్హం
తెలంగాణ రాష్ట్రసామాజిక సేన: మహారాష్ట్రలోని సోలాపూర్కు చెందిన ఈ సంస్థ, కవిత పార్టీ ప్రకటన కంటే ముందే ఈసీకి ‘టీఆర్ఎస్’ పేరు కోసం దరఖాస్తు చేసుకుంది.
తెలంగాణ రాజ్య సమితి : రాష్ట్ర ఎన్నికల సంఘం వద్ద ఇప్పటికే నమోదై ఉన్న ఈ పార్టీ కూడా తమ సంక్షిప్త నామం ‘టీఆర్ఎస్’ అని, దానిని ఇతరులకు ఇవ్వద్దంటూ అభ్యంతరాలు వ్యక్తం చేసింది.
వందల సంఖ్యలో అభ్యంతర పత్రాలు
పత్రికల్లో వచ్చిన ప్రకటనల ఆధారంగా సాధారణ ప్రజల నుంచి సైతం వందల సంఖ్యలో అభ్యంతర పత్రాలు కేంద్ర ఎన్నికల సంఘానికి అందినట్లు రాజకీయ వర్గాల్లో చర్చ జరుగుతోంది. ఈ ఊహించని పరిణామాలతో కవిత ప్రతినిధుల బృందం అప్రమత్తమైంది. త్వరలోనే ఈసీని కలిసి తమ వాదనలను బలంగా వినిపించేందుకు సిద్ధమవుతున్నారు.
పలు రాజకీయ పార్టీలు, సామాజిక సంస్థల నుంచి గట్టి పోటీ మరియు అభ్యంతరాలు వ్యక్తమవుతున్న తరుణంలో… చివరకు కవిత ఆశించిన ‘టీఆర్ఎస్’ సంక్షిప్త నామం ఆమెకు దక్కుతుందా లేదా అనేది ఇప్పుడు ఉత్కంఠ రేపుతోంది.
