ప్రపంచం కరోనా మహమ్మారి భయాల నుంచి పూర్తిగా కోలుకోకముందే మరో ప్రమాదకర వైరస్ వార్తలు ప్రపంచవ్యాప్తంగా తీవ్ర ఆందోళన కలిగిస్తున్నాయి. ఆఫ్రికా ఖండంలో ఎబోలా వైరస్ (Ebola Virus) మళ్లీ వేగంగా వ్యాపిస్తుండటంతో ప్రపంచ ఆరోగ్య సంస్థ (WHO) అత్యంత అరుదుగా ప్రకటించే “పబ్లిక్ హెల్త్ ఎమర్జెన్ー ఆఫ్ ఇంటర్నేషనల్ కన్​సర్న్” (గ్లోబల్ హెల్త్ ఎమర్జెన్సీ)ని ప్రకటించింది. ఒక వ్యాధి దేశాల సరిహద్దులు దాటి ఇతర ప్రాంతాలకు వేగంగా వ్యాపించే అవకాశం ఉన్నప్పుడు మాత్రమే ఇలాంటి హెచ్చరిక జారీ చేస్తారు. ప్రస్తుతం ఈ వైరస్ కాంగో, ఉగాండా దేశాల్లో వందల సంఖ్యలో కేసులతో వినాశనం సృష్టిస్తోంది.

ఈసారి ఎందుకంత భయం? ‘బుండిబుగ్యో’ స్ట్రెయిన్ కలవరం!

ఎబోలా ఆఫ్రికాకు కొత్త వ్యాధి కాకపోయినప్పటికీ, ఈసారి వెలుగులోకి వచ్చిన వైరస్ “బుండిబుగ్యో” (Bundibugyo) అనే అత్యంత అరుదైన, ప్రమాదకరమైన స్ట్రెయిన్ కావడమే ఇందుకు ప్రధాన కారణం. ఈ స్ట్రెయిన్‌ను అడ్డుకోవడానికి ప్రస్తుతం మార్కెట్‌లో పూర్తి స్థాయి ఆమోదం పొందిన వ్యాక్సిన్ అందుబాటులో లేదు. కొన్ని ప్రయోగ దశ వ్యాక్సిన్లు ఉన్నప్పటికీ, వాటిని పెద్ద ఎత్తున ప్రజలకు వాడే పరిస్థితి ఇంకా రాలేదు. పైగా, ఈ వైరస్ వ్యాపిస్తున్న ప్రాంతాలు ఇప్పటికే యుద్ధాలు, పేదరికం, వైద్య సదుపాయాల కొరతతో కొట్టుమిట్టాడుతుండటం వల్ల వైరస్‌ను అదుపు చేయడం డబ్ల్యూహెచ్‌ఓకు పెద్ద సవాల్‌గా మారింది.

Ebola Virus : అసలు ఎలా వ్యాపిస్తుంది? కరోనా తరహా వైరస్సేనా?

చాలామంది ఎబోలా పేరు వినగానే ఇది కరోనా లాగా గాలి ద్వారా వ్యాపిస్తుందేమోనని భయపడుతున్నారు. కానీ, ఎబోలా గాలి ద్వారా వ్యాపించదు; దీని వ్యాప్తి పూర్తిగా భిన్నం. వైరస్ సోకిన రోగి యొక్క రక్తం, చెమట, ఉమ్మి, వాంతులు, విరేచనాలు వంటి శరీర ద్రవాలు నేరుగా మరొకరి శరీరానికి తగిలితేనే ఇది వ్యాపిస్తుంది. రోగులు వాడిన వస్తువులను తాకినా, సంప్రదాయ అంత్యక్రియల సమయంలో మృతదేహాన్ని తాకినా ఈ వైరస్ సోకుతుంది. అందుకే సరైన రక్షణ పరికరాలు లేని వైద్య సిబ్బందికి ఈ వైరస్ సోకే ప్రమాదం అత్యధికంగా ఉంది.

ఎబోలా ప్రాణాంతక లక్షణాలు ఇవే..

Ebola Symptoms :

• మొదటి దశలో ఇది తీవ్రమైన జ్వరం, అలసట, తలనొప్పి, కండరాల నొప్పితో సాధారణ జ్వరంలాగే మొదలవుతుంది. దీంతో చాలామంది దీన్ని నిర్లక్ష్యం చేస్తారు.
• ఆ తర్వాతి దశలో వాంతులు, విరేచనాలు, తీవ్రమైన కడుపు నొప్పి మొదలవుతాయి. పరిస్థితి మరింత విషమిస్తే శరీరంలో అంతర్గత రక్తస్రావం (Internal Bleeding) జరిగి కళ్లు, ముక్కు, నోటి నుంచి రక్తం కారుతుంది.
• ఈ వైరస్ శరీర రక్షణ వ్యవస్థను పూర్తిగా కుంగదీయడం వల్ల ఎబోలాలో మరణాల శాతం ఇతర వైరస్‌ల కంటే చాలా ఎక్కువగా ఉంటుంది.

భారత్‌కు, తెలుగు రాష్ట్రాలకు ప్రమాదముందా?

ఈ వార్తల నేపథ్యంలో కేంద్ర ఆరోగ్య శాఖ రంగంలోకి దిగింది. ప్రస్తుతం భారతదేశంలో ఒక్క Ebola Virus కేసు కూడా లేదని, 2014 తర్వాత దేశంలో కొత్త కేసు నమోదు కాలేదని స్పష్టం చేసింది. అయినప్పటికీ ముందస్తు జాగ్రత్తగా అంతర్జాతీయ విమానాశ్రయాల్లో నిఘా తీవ్రం చేశారు. హైదరాబాద్‌లోని రాజీవ్ గాంధీ అంతర్జాతీయ విమానాశ్రయంతో (RGIA) పాటు అన్ని ప్రధాన ఎయిర్‌పోర్టులలో ఆఫ్రికా దేశాల నుంచి వచ్చే ప్రయాణికులకు థర్మల్ స్క్రీనింగ్ నిర్వహిస్తున్నారు. అనుమానిత లక్షణాలు ఉంటే పరీక్షించేందుకు పుణెలోని నేషనల్ ఇన్‌స్టిట్యూట్ ఆఫ్ వైరాలజీ (NIV) ల్యాబ్‌ను సిద్ధం చేశారు.

తీసుకోవాల్సిన జాగ్రత్తలు.. వదంతులు నమ్మకండి!

ప్రస్తుతం మనదేశంలో భయపడాల్సిన పరిస్థితి లేదని, అయితే అవగాహన మాత్రం తప్పనిసరని నిపుణులు చెబుతున్నారు. అత్యవసరమైతే తప్ప ఆఫ్రికా ప్రభావిత ప్రాంతాలకు వెళ్లకపోవడం మంచిది. ఒకవేళ వెళ్లాల్సి వస్తే అంతర్జాతీయ ప్రయాణ హిస్టరీని దాచకుండా అధికారులకు సహకరించాలి. సోషల్ మీడియాలో వస్తున్న “మళ్లీ లాక్‌డౌన్ వస్తుంది” వంటి తప్పుడు ప్రచారాలను, వదంతులను నమ్మవద్దని కేంద్ర ఆరోగ్య శాఖ స్పష్టం చేసింది.