ఒకే గొడుగు కిందకు మూడు విభాగాలు

Bhu Bharati Portal Pilot Launch | తెలంగాణ రాష్ట్రంలో భూ వివాదాలకు శాశ్వత పరిష్కారం చూపాలన్న సంకల్పంతో ప్రభుత్వం మరో ముందడుగు వేసింది. ముఖ్యమంత్రి రేవంత్ రెడ్డి ఆలోచన మేరకు రూపొందించిన ‘భూభారతి’ (Bhu Bharati) పోర్టల్‌ను రేపటి నుంచి (ఏప్రిల్ 2) ప్రయోగాత్మకంగా ఐదు మండలాల్లో ప్రారంభించబోతున్నట్లు రెవెన్యూ శాఖ మంత్రి పొంగులేటి శ్రీనివాసరెడ్డి (Ponguleti Srinivasa Reddy) వెల్లడించారు. కేరళ పర్యటనలో ఉన్న ఆయన బుధవారం అధికారులతో టెలికాన్ఫరెన్స్ నిర్వహించి కీలక ఆదేశాలు జారీ చేశారు.

రైతులకు పారదర్శకమైన, సులభతరమైన సేవలు అందించడమే లక్ష్యంగా ల్యాండ్, సర్వే, రిజిస్ట్రేషన్ విభాగాలను సమన్వయం చేస్తూ ఈ ‘ఇంటిగ్రేటెడ్ భూభారతి పోర్టల్’ను రూపొందించారు. దీనివల్ల రైతులు ఇకపై కార్యాలయాల చుట్టూ తిరగాల్సిన అవసరం ఉండదు.

Bhu Bharati Portal ప్రాజెక్ట్ అమలు కానున్న 5 మండలాలు ఇవే:

రాష్ట్రవ్యాప్తంగా అమలు చేసే ముందు, తొలి దశలో ఈ క్రింది ఐదు మండలాల్లో ప్రయోగాత్మకంగా భూభారతి సేవలు అందుబాటులోకి రానున్నాయి:

1. కూసుమంచి (ఖమ్మం జిల్లా)
2. అశ్వరావుపేట (భద్రాద్రి కొత్తగూడెం జిల్లా)
3. అమన్‌గల్ (రంగారెడ్డి జిల్లా)
4. వట్‌పల్లి (సంగారెడ్డి జిల్లా)
5. కొస్గి (నారాయణపేట జిల్లా)

భూభారతి పోర్టల్ (Bhu Bharati Portal) ప్రత్యేకతలు:

• స్మార్ట్‌ఫోన్‌తో సేవలు: మీ సేవ కేంద్రాలకు వెళ్లకుండా, రైతులు తమ ఇంటి నుంచే స్మార్ట్‌ఫోన్ ద్వారా భూ వివరాలు పొందవచ్చు.
• భూధార్ & LPM నంబర్లు: ఆధార్ తరహాలోనే ప్రతి భూమికి ‘భూధార్’ నంబర్, ప్రతి సర్వే మ్యాప్‌కు LPM (Land Parcel Map) నంబర్ కేటాయిస్తారు.
• ఆధునిక సర్వే: పాత పద్ధతులకు స్వస్తి చెప్పి, అత్యాధునిక రోవర్లతో (Rovers) అత్యంత ఖచ్చితత్వంతో సర్వే నిర్వహిస్తారు.
• SMS అలర్ట్స్: దరఖాస్తు చేసుకున్నప్పటి నుంచి రిజిస్ట్రేషన్ పూర్తయ్యే వరకు ప్రతి దశలో రైతు మొబైల్‌కు ఎస్ఎమ్ఎస్ (SMS) ద్వారా సమాచారం అందుతుంది.

సర్వే ప్రక్రియ సాగుతుందిలా..

రైతు పోర్టల్‌లో లాగిన్ అయి సర్వే కోసం ఫీజు చెల్లించగానే, ఆ వివరాలు లైసెన్స్‌డ్ సర్వేయర్‌కు వెళ్తాయి. రెండు రోజుల్లో పొరుగు రైతులకు నోటీసులు ఇచ్చి, ఏడు రోజుల్లోపు సర్వే పూర్తి చేస్తారు. తహసీల్దార్ ఆమోదం పొందిన తర్వాత సర్వే మ్యాప్ పోర్టల్‌లో అప్‌లోడ్ అవుతుంది.

“రైతు కోణంలో రూపొందించిన ఈ పోర్టల్ భవిష్యత్తులో భూ వివాదాలను పూర్తిగా తగ్గిస్తుంది. ఈ ఐదు మండలాల్లో వచ్చే ఫలితాలను బట్టి రాష్ట్రవ్యాప్తంగా మార్పులు చేర్పులతో భూభారతిని అమలు చేస్తాం” అని మంత్రి పొంగులేటి పేర్కొన్నారు.

తెలుగు వార్తలు, ప్రత్యేక కథనాలు, ట్రెండింగ్ వీడియోల కోసం సర్కార్ లైవ్ వెబ్ సైట్ ను సందర్శించండి.  అలాగే మా   వాట్సప్ చానల్, ఎక్స్(ట్విట్టర్)  ను  ఫాలో అవండి.  మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు.