Telangana Land Rates Hike | ముఖ్యమంత్రి రేవంత్ రెడ్డి అధ్యక్షతన సోమవారం జరిగిన రాష్ట్ర మంత్రి మండలి సమావేశంలో పలు సంచలన నిర్ణయాలు తీసుకున్నారు. ప్రధానంగా భూముల ధరల సవరణ మరియు గత ప్రభుత్వ హయాంలో జరిగిన విద్యుత్ అక్రమాలపై కీలక చర్యలకు కేబినెట్ ఆమోదం తెలిపింది.
భూముల ధరల సవరణ (Telangana Land Rates Hike)
రాష్ట్రంలో వాస్తవ మార్కెట్ ధరలకు, ప్రభుత్వ రికార్డుల్లో ఉన్న ధరలకు మధ్య ఉన్న వ్యత్యాసాన్ని తగ్గించేందుకు భూముల విలువలను సవరించాలని కేబినెట్ నిర్ణయించింది.
- అమలు: సవరించిన కొత్త ధరలు ఈ నెల చివరి వారం నుండి అమల్లోకి రానున్నాయి.
- రేషనలైజేషన్: మార్కెట్ విలువల రేషనలైజేషన్ చేసేందుకు రిజిస్ట్రేషన్ శాఖకు ప్రభుత్వం అనుమతి ఇచ్చింది.
- పరిహారం: రోడ్ల విస్తరణ, ప్రాజెక్టుల్లో భూములు కోల్పోయే నిర్వాసితులకు శాస్త్రీయ పద్ధతిలో మెరుగైన పరిహారం అందించడమే ఈ నిర్ణయం ప్రధాన ఉద్దేశ్యం.
- హిల్ట్ పాలసీ: ధరలు పెరగకముందే దరఖాస్తు చేసుకుని 10% సొమ్ము చెల్లించిన వారికి పాత ధరలే వర్తిస్తాయి.
విద్యుత్ అక్రమాలపై సీబీఐ విచారణ
భద్రాద్రి, యాదాద్రి థర్మల్ పవర్ ప్లాంట్లు మరియు విద్యుత్ కొనుగోళ్లలో జరిగిన అక్రమాలపై నిష్పాక్షిక విచారణ కోసం కేసును సీబీఐకి అప్పగించాలని కేబినెట్ నిర్ణయించింది. జస్టిస్ మదన్ బి. లోకూర్ కమిషన్ సమర్పించిన 114 పేజీల నివేదిక ఆధారంగా ఈ నిర్ణయం తీసుకున్నారు. ఇందులో అంతర్రాష్ట్ర అంశాలు, కేంద్ర ప్రభుత్వ రంగ సంస్థల ప్రమేయం ఉన్నందున సీబీఐ విచారణే సరైనదని భావించారు.
వన్ టైమ్ సెటిల్మెంట్ (OTS)
గ్రేటర్ హైదరాబాద్ (GHMC), సైబరాబాద్ పరిధిలోని ప్రభుత్వ కార్యాలయాల పన్ను బకాయిల క్లియరెన్స్ కోసం వన్ టైమ్ సెటిల్మెంట్ వెసులుబాటు కల్పించారు. దాదాపు రూ. 5,864 కోట్ల బకాయిలు ఉండగా, వడ్డీలు మినహాయించి ఈ పథకం ద్వారా రూ. 1,686 కోట్లు వస్తాయని ప్రభుత్వం అంచనా వేస్తోంది.
ఇతర ముఖ్య నిర్ణయాలు
- సోలార్ పవర్: రాష్ట్రంలోని 9 జిల్లాల్లో 18 చోట్ల సోలార్ పవర్ జనరేషన్ ప్లాంట్ల ఏర్పాటుకు రూ. 66.50 కోట్లు కేటాయించారు.
- స్కిల్ యూనివర్సిటీ: ఐటీఐలు, పాలిటెక్నిక్లు, టీ-శాట్ లను యంగ్ ఇండియా స్కిల్ యూనివర్సిటీ పరిధిలోకి తీసుకువచ్చారు.
- పంట నష్టం: అకాల వర్షాలతో నష్టపోయిన రైతులను ఆదుకోవాలని ఇంచార్జి మంత్రులను సీఎం ఆదేశించారు.
- నార్మాక్ (NARMAC): నల్గొండ-రంగారెడ్డి పాల ఉత్పత్తిదారుల సంఘం బాధ్యతలను నేషనల్ డెయిరీ డెవలప్మెంట్ బోర్డు (NDDB)కు అప్పగించేందుకు ఆమోదం తెలిపారు.
